OUDTSHOORN NUUS - Inwoners het verlede Donderdag gehoor dat die gebruik van metamfetamien (tik) soos `n tsunami oor gemeenskappe spoel.
"Dit is een van die mees verslawende middele daar buite en as dit eers sy kloue in `n persoon geslaan het, is dit bykans onmoontlik om weer van die verslawing verlos te word," het Jean Golden aan sy gehoor vertel.
Golden, `n pastoor, is vir die afgelope paar jaar in Beaufort-Wes woonagtig en veral met die berading van dwelmverslaafdes van oor die Karoo werksaam.
Hy is reeds die afgelope twaalf jaar besig om `n studie van tikmisbruik te doen en het ook `n dokumentêr oor die onderwerp verfilm. In sy praatjie het Golden `n donker prentjie geskets van lewens wat verwoes word.
Dit was veral die wyse waarop metamfetamien breinfunksie aftakel en denkpatrone herbedraad wat hy in detail aan sy gehoor kon skets.
Die enigste uitweg is vir gemeenskappe om saam te span, hande te vat en saam op te staan," was sy boodskap.
Hy het ook die breër ekonomiese impak van dwelmmisbruik belig. "Die ekonomie word op alle gebiede getoets. Misdaad neem toe, mense kan nie meer werk nie, die staat se hulpbronne word uitgeput. Dit is veral in klein dorpies, waar sakemanne en beleggers lugtig sal wees vir `n omgewing waar dwelmmisbruik hoogty vier, waar die gemeenskap die ekonomiese impak sal voel."
Volgens Golden wys studies dat 16 tot 17-ja-riges wêreldwyd die teikengroep vir metamfetamien is. In Suid-Afrika verlaag die ouderdom egter na 13 tot 15-jariges.
"Die euforie wat `n gebruiker van die dwelmmiddel ervaar, is een honderd maal erger as heroïen. Tik is ook drie keer meer verslawend," het Golden gesê.
Hy het New York voorgestel as voorbeeld van waar `n suksesvolle projek wat dwelmmisbruik kon inperk geloods is.
"Daar het die stadsowerhede sekere gebiede tot dwelmvrye sones ver-klaar. Enigeen wat in daardie gebiede beweeg kon enige tyd vir dwelmgebruik getoets word. So het die sones later vergroot en uitgekring."
Elisabe Olivier, maatskaplike werker, wat ook die samekoms gereël het, het Golden se boodskap beaam.
"Dit is belangrik dat individue uit die gemeenskap na vore tree en hulself beskikbaar stel om by ons projek betrokke te raak. Ons beoog om `n ondersteuningspan te stig wat saam die pad vorentoe kan beplan oor hoe om die probleem te takel."
Belangstellendes kan Olivier by die Famsa-kantore skakel, by 044 272 7020.
'Ons bring jou die nuutste Oudtshoorn, Klein-Karoo nuus'
