OUDTSHOORN NUUS - Adjudant-offisier Jan Combrinck, 'n bekende en gerespekteerde figuur in Oudtshoorn, is Woensdag 5 November tydens die jaarlikse Tuinroete-distrik se uitnemendheidstoekennings vir polisielede as man van die jaar aangewys. 

Combrinck, wat al jare lank met toewyding in diens van die gemeenskap staan, beskryf die eer as 'n groot voorreg. "Ek kan net die Here die eer gee," sê hy.

"Die werk wat ek doen, doen ek vir die Koninkryk. Hierdie toekenning gaan nie net oor wat jy daagliks in jou werk verrig nie, maar oor die ekstra dinge wat jy vir mense doen, die ekstra myl wat jy stap om misdaad te voorkom en lewens te raak, selfs ná ure."

Hy hoop sy prestasie sal ander polisielede inspireer om dieselfde toewyding aan die dag te lê. "Ons is in die polisie om die gemeenskap te dien. As elkeen 'n bietjie meer doen, maak dit 'n groot verskil," voeg hy by.

Die Uitnemendheidstoekennings 2025 is by die George Metodiste-familiekerk gehou, waar lede van die 21 polisiestasies in die Tuinroete-distrik saamgekom het om kollegas te vier wat bo en behalwe hul pligte uitgestyg he 

Generaal-majoor Phumzile Cetyana, distrikskommissaris van die Tuinroete, het die seremonie afgesluit met lof vir die wenners en alle lede van die SAPD. "Ek is geweldig trots op ons hardwerkende, lojale en toegewyde beamptes. Julle is die ruggraat van gemeenskapsveiligheid in ons distrik," het sy gesê.

‘Ons bring jou die nuutste Tuinroete, Hessequa, Karoo nuus’