OUDTSHOORN NUUS - "'n Hond is mos 'n man se beste vriend en daarom het ons besluit om ons Vadersdagete ten bate van honde te hou." So sê Daniël Terblanche, mede-eienaar van die Black Swan Restaurant.
Die Black Swan was volbespreek vir Sondag se Vadersdagete wat op 'n groot bederf vir die honde in die munisipale skut uitgeloop het.
Die eerste bederf was bene en oorskiet vleis wat vir die honde gegee is.
Daarna het die eienaars van Black Swan besluit om al die winste van die Vadersdagete te gebruik om kos, slaapmandjies, speelgoed en kosbakke vir die skut se honde te koop. Die skenking is Maandag aan Colleen Smith-Coetzee van Dogs in Need oorhandig.
"Ons het dit spesifiek vir haar gegee omdat sy op 'n daaglikse basis by die skut betrokke is en presies weet wat die behoefte is," het Terblanche Maandag gesê.
Volgens Smith-Coetzee is daar tans ongeveer 40 honde by die skut, maar sy is baie opgewonde oor die gereelde basis waarop mense honde aanneem.
Oor die skenking het sy gesê: "Dit is net as gevolg van mense en besighede soos Black Swan wat ons na die honde kan omsien. Ons waardeer elke skenking en elke bietjie hulp ongelooflik baie."
Colleen Smith-Coetzee (derde van regs) ontvang die skenking van Black Swan. By haar is die bestuurpersoneel van die restaurant. Van links is: Janru Swanepoel, Morgan May' Anna Svegliati, Daniel Terblanche (eienaar), Colleen, Whitney Bezuidenhout en Dina Stuurman. Foto: Hannes Visser.
ARTIKEL EN FOTO: HANNES VISSER, OUDTSHOORN COURANT-REDAKTEUR
'Ons bring jou die nuutste Oudtshoorn, Klein Karoo nuus'
