OUDTSHOORN NUUS- Die voormalige hoof van die Eljada Nasorgsentrum vir Volwassenes met Gestremdhede op Oudtshoorn, prof. Machiel Potgieter (73) wat op drie klagtes van verkragting tereggestaan het is Maandag in die Oudtshoorn-streekhof vrygespreek en ontslaan.
Streeklanddros Daniel Boks het 'n Artikel 274 aansoek om ontslag van Potgieter se regsverteenwoordiger, adv. Marius Broeksma, toegestaan op gronde dat die getuienis van die staat van so 'n aard is dat geen skuldigbevinding moontlik sal wees nie.
Potgieter se 31-jarige peetkind het beweer dat hy by drie geleenthede deur Potgieter verkrag is maar aan personeellede, onder wie die huidige hoof van die sentrum, Wilma Lemmer, ontken dat dit gebeur het.
Die staatsaanklaer, adv. Michelle Weyers, het gesê dat die klaer se getuienis nie geïgnoreer kan word nie.
Lemmer se getuienis het, volgens die hof, die staat onkant gevang.
"Die staat se getuienis moet van so 'n aard wees dat 'n beskuldigde daarop skuldig bevind kan word en in dié saak is dit nie die geval nie," het die landdros gesê.
Die 31-jarige klaer het getuig hoe die beskuldigde hom by twee geleenthede anaal gepene-treer het en by 'n derde geleentheid sy vinger gebruik het.
Die beskuldigde het hom met die dood gedreig indien hy vir enigiemand daarvan sou vertel.
Hy was bang hy verloor sy plek in die sentrum en het daarom stilgebly. Aan Lemmer het hy gesê dat hy nie weer na die beskuldigde wou gaan nie.
In transkripsies wat Lemmer aan die hof voorgelê het, sê die klaer egter dat die beskuldigde hom slegs "gesoen en gedruk" het en nie aan sy geslagsdele gevat het nie.
Hy het meer as een keer gesê: "daar het niks gebeur nie".
Die hof het bevind dat daar 'n groot vraagteken oor die hele saak hang en die verdediging gelyk gegee dat die beskuldigde nie vervolg kan word op beperkte minimum getuienis nie.
"Die beskuldigde is dus geregtig op ontslag en word vrygespreek," het die landdros gesê.
Klik hier vir vorige aritkels:
- Oudhoof van Eljada onskuldig
- Verkragtingsaak teen oudhoof weer uitgestel
- Saak teen oudhoof van Eljada uitgestel
- Saak teen oudhoof uitgestel
- Potgieter-saak steeds nie afgehandel
- Potgieter-saak sloer steeds
- Saak teen voormalige hoof weer uitgestel
- Saak teen voormalige hoof weer uitgestel
- Professor se verkragtingsaak uitgestel
ARTIKEL: GARNETT WICOMB, OUDTSHOORN COURANT-KORRESPONDENT
'Ons bring jou die nuutste Oudtshoorn, Klein Karoo nuus'
