Munisipaliteit reageer op "aardbewing"

Update

TUINROETE | KAROO NUUS - Gerugte wat gister die ronde gedoen het oor ‘n aardbewing by die Kango-grotte en toeriste wat vassit, het behoorlik die land op hol gehad.

Volgens Aurelia Mle, woordvoerder van die Oudtshoorn-munisipaliteit, het hulle ‘n "dummy run" by die grotte gedoen om te kyk of die ontruimingsplan vir 'n grotredding reg werk.

“Die Oudtshoorn-munisipaliteit wil die publiek inlig dat onlangse berigte van 'n aardbewing by die Kango-grotte heeltemal ongegrond is. Daar was geen aardbewing by die grotte nie, en daar was geen individue ondergronds vasgekeer nie. Die boodskap wat oor hierdie vermeende aardbewing versprei het, was inderwaarheid deel van ’n noodoefening gister, 13 September.”

Volgens haar is hierdie oefening ‘n begin om 'n rampsenario te simuleer, spesifiek 'n grotreddingsoperasie, en om die reaksie en doeltreffendheid van reddingspanne te evalueer.

“Die sleuteldoelwit van 'n simulasie van hierdie aard is om nie vooraf waarskuwings te verskaf om die reaksie en doeltreffendheid van ons noodreaksiespanne te bepaal nie. Tydens hierdie oefening is vyf “pasiënte” op verskillende plekke in die grotte geplaas.”

Volgens haar is dit belangrik om daarop te let dat terwyl die topbestuur van die betrokke organisasies, insluitend rampbestuur, ambulansdienste, die Suid-Afrikaanse polisiedienste, hospitale, Oudtshoorn-verkeersdepartement asook die Suid-Afrikaanse Nasionale Weermag, ingelig is oor die oefening, is die reddingspan op die terrein doelbewus onbewus van die oefening gehou om te verseker dat die simulasie so realisties moontlik lyk.

Adel Supra-Vertue, hoof van brandweer, redding en rampbestuur het gesê dat die oefening gedien het as 'n kritieke toets van die gereedheid en paraatheid van ons reddingspanne vir enige potensiële ramp wat by die Kango-grotte of soortgelyke omgewings mag voorkom.

"Deur hierdie onaangekondigde simulasies uit te voer, kan ons 'n beter gevoel kry van ons vermoë om vinnig en doeltreffend op noodgevalle te reageer en die veiligheid van ons gemeenskap en besoekers te verseker."

Vorige artikel: Aardbewing gerugte vals