CALITZDORP NUUS - Boplaas is Saterdag 11 Oktober weer as top-gefortifiseerde produsent bekroon tydens vanjaar se Veritas-toekennings, Suid-Afrika se mees vooraanstaande wyn- en spiritualieëkompetisie.
Dié gesogte wynkelder net buite Calitzdorp het vanjaar 12 medaljes verower, wat sy algehele totaal sedert die ontstaan van die Veritas-kompetisie tot 'n indrukwekkende 265 laat styg het.
Nog meer merkwaardig is dat 105, oftewel 40%, van hierdie medaljes oor die jare heen dubbelgoud- of goudtoekennings is, 'n bewys van Boplaas se volgehoue uitnemendheid en gehalte.
Vanjaar het Boplaas nóg 'n dubbelgoud ontvang vir die Boplaas Nel Family Reserve Ring of Rocks 2022, sowel as sy Cape Tawny NV en Cape Vintage Reserve Port 2009, onder slegs agt versterkte wyne wat die toekenning ontvang het.
Goud is toegeken aan die Boplaas Touriga Nacional 2024, Cape Tawny 20 Year Old Colheita 2005, en Cape Vintage Reserves van 2023, 2022 en 2021.
Hierdie uitsonderlike prestasie het verseker dat Boplaas weer vanjaar die topvervaardiger in die kategorie van fortifiseerde wyne by Veritas geword het.
"Erkenning by die Veritas-toekennings is altyd 'n eer, maar dit is veral betekenisvol wanneer ons medaljes wyne van verskillende style en prysvlakke insluit," sê wynmaker Margaux Nel van Boplaas.
"Dit bevestig weereens dat uitstaande kwaliteit deur elke vlak van ons portefeulje vloei, van alledaagse gunstelinge tot ons mees gesogte wyne."
Die Veritas-toekennings
Die 35ste Veritas-toekennings is Saterdag-aand tydens 'n galadinee by die Kaapstadse Internasionale Konvensiesentrum gehou. Benewens vervaardigers van regoor die land, was gaste, waar onder die minister van landbou, John Steenhuizen, die Wes-Kaapse premier Alan Winde en Kaapstad-burgemeester Geordin Hill-Lewis ook teenwoordig.
Die Veritas-toekennings, wat in 1990 as die Nasionale Gebottelde Wynskou begin het, is vandag die hoogtepunt van die Suid-Afrikaanse wynbedryf se toekenningsseisoen. Reeds destyds het Boplaas sy vernuf met wyn, port en brandewyn bewys en as medestigter van die Klein Karoo Wynvereniging uitgestaan. Sy Ruiterbosch Chardonnay 1991 is later by 'n internasionale kompetisie in Duitsland as Beste van die Skou aangewys.
Sedertdien het Boplaas by Veritas bly uitblink met sy brandewyn- en portprestasie, terwyl dit ook sterk presteer met muskaat-, rooi- en witwyne. Vanjaar se Dubbelgoud Ring of Rocks het uitgeblink in die mees mededingende kategorie, met 149 rooi versnitwyne wat meegeding het.
In 2021 is Carel Nel as 'n "Lewende Legende" van die Suid-Afrikaanse wynbedryf vereer, 'n titel wat slegs toegeken word aan persone wat 'n blywende bydrae tot die gehalte en integriteit van plaaslike wyne gelewer het.
‘Ons bring jou die nuutste Tuinroete, Hessequa, Karoo nuus’
