PRINS ALBERT-NUUS - Lede van die Sentrale Karoo se blitspatrollie het Saterdag 1 November op dwelms met ’n geraamde straatwaarde van R56 000 in Prins Albert in beslag gelê.
Volgens sers. Chris Spies, Suid-Kaapse polisiewoordvoerder, was die lede langs hoofingangs- en uitgangsroetes na die provinsie ontplooi.
“Omstreeks 08:00 het die span, in samewerking met Wes-Kaapse provinsiale verkeersbeamptes, ’n voertuigkontrolepunt by Prins Albertweg naby die dorpsingang uitgevoer. ’n Isuzu-bakkie op pad van Johannesburg na Kaapstad is voorgekeer vir ’n roetinekontrole. Tydens die deursoeking het die beamptes twee pakkies dagga agter in die voertuig ontdek, waar dit netjies versteek was.”
Hy sê die dwelms is gekonfiskeer en ’n 22-jarige passasier is in hegtenis geneem op ’n aanklag van dwelmhandel. Hy bly in aanhouding en sal in die hof verskyn sodra die klag formeel gelê is.
Spies sê die strategiese ontplooiing van beamptes langs hoof- en sekondêre roetes vorm deel van ’n voortdurende veldtog teen dwelmsmokkelary, veral met die oog op die Veiliger Feesseisoen-operasies wat tans in volle swang is.
‘We bring you the latest Garden Route, Hessequa, Karoo news’
