OUDTSRHOON SAKE NUUS - Oudtshoorniete kan uiteindelik uitsien na kwaliteit mediese sorg teen bekostigbare tariewe. Die professionele span van Quick Care, `n nuwe instap mediese kliniek in St Johnstraat, dek `n wye reeks mediese behoeftes sonder die bykomende sorge van afsprake en `n lang gewag.

Leré Stander, Quick Care se primêre gesondheidsversorger, staan aan die hoof van `n uiters bekwame en professionele span wat hul dienste aan die publiek beskikbaar stel om die behoeftes aan te spreek van soveel mense wat mediese sorg verlang, maar deur stygende kostes verhoed word.

"Ons doel is om 'n warm, vriendelike en rustige atmosfeer te skep waar elke pasiënt belangrik is vir ons," vertel Stander.

Stander het reeds 14 jaar ervaring as ge-kwalifiseerde hospitaal verpleegster agter die rug waarvan die laaste agt jaar as primêre gesondheidsuster by die weermag. Pasiënte kan dus verseker wees van slegs die beste diens wat insluit:

• Konsultasie vir siektetoestande met medikasie teen bekostigbare fooi
• Wondsorg vir enige tipe wonde
• Bloeddrukmonitering
• Suikertoetse
• HIV-toetse en berading
• Tuisbesoeke

Stander en haar span bied omvattende dienste om bykans elke behoefte rondom gesondheidsorg aan te spreek. Daar kan van Karien Visser, 'n fisioterapeut, se dienste gebruik gemaak word. Lourika Stander is Quick Care se dieetkundige. Stander stel gebalanseerde en bekostigbare kospakkies aan skoolkinders en volwassenes beskikbaar en werk aan `n soortgelyke program vir babas.

Karen Stander staan aan die stuur van die babakliniek. Hier kan alle nodige immunisasies verkry word. Stander bied ook voorgeboorte klasse, baba masseringsklasse asook `n borsvoedingkliniek, alles teen bekostigbare pryse.

Besoek Quick Care gerus by St Johnstraat 139 of skakel 044 272 5347 of 044 272 5372.