Oudtshoorn vier van 24 tot 30 Maart, oor Paasnaweek en in die nasionale skoolvakansie, vir die 22ste keer fees.
Volgens Theart bied die program aan feesgangers ’n geleentheid om uitstaande werke te sien wat dieper delg, konfronteer en uitdaag.
“Dit is werke wat feesgangers sal vermaak en hopelik nog vir jare ’n indruk sal laat. Die produksies sal gehore laat gesels en debatteer. Teater gebeur nie net in die uur of meer wat dit in die ouditorium of saal is nie – dit is juis die impak, gesprekke en debatte na afloop van die vertonings en rondom die dramas wat teater tot sy volle reg laat kom”, vertel hy. Theart sê hy hoop dat die dramas vanjaar gehore sal laat gons.
Die klassieke Spaanse werk Die huis van Bernarda Alba is een van die fees se debuutdramas. Hierdie tragedie, oorspronklik uit die pen van Federico García Lorca, is onder regie van Christiaan Olwagen, met ontwerp deur die bekroonde Birrie le Roux en Rocco Pool.
Die hoofrol van die matriarg Bernarda Alba word vertolk deur Antoinette Kellermann, wat met die Kunste Onbeperk-prys vir Vertolking vereer word. Bernarda Alba is ’n rigiede streng moeder. Die drama ontvou na die dood van haar tweede man en wanneer sy ’n rou-periode van twee jaar vir al haar dogters verklaar.
Die familie is vasgevang in ’n versengende huis wat begin prut, waar die spanning en jare se onderdrukking opbou en ontplof.
Olwagen is bekend vir sy moderne aanslag met klassieke werke soos Tsjechof se Die Seemeeu en Ibsen se Doll’s House. Dieselfde kan met dié Spaanse werk verwag word. Kellermann deel die verhoog met Dawid Minnaar, Lida Botha, Joanie Combrink, Tinarie van Wyk Loots, Cintaine Schutte, Lorraine Burger, Mariechen Vosloo en nuweling Anoecha Krüger.
Samuel Beckett, formidabele skrywer en Nobelpryswenner, se werk is vir die eerste keer in Afrikaans te sien. Nouliks of niks: kort stukke deur Samuel Beckett is ’n vertaling van agt van Beckett se korter stukke deur Willem Anker, ontvanger van die Kunste Onbeperk-prys vir Vernuwende Denke.
Die kort toneelstukke is minimalistiese teater met narrespel, gevul met humor, nostalgie en eenvoud. Die regie word deur vyf regisseurs (Jaco Bouwer, Wolf Britz, Amy Jeptha, Lara Bye en Sandra Temmingh) behartig, met vier akteurs in die rolverdeling naamlik Gerben Kamper, Nicole Holm, Albert Pretorius en Landi Beeslaar.
Vinette Ebrahim se vertolking van Katie Jacobs, ’n vrou uit ’n Distrik Ses-familie, in die debuutdrama Invisible onder regie van Christo Davids, sal jou koud laat. Ebrahim verduidelik dat Katie se storie nie net gaan oor die forced removals wat die gemeenskap uitmekaar geskeur het nie. “Dit was mense ook. Gewone mense.” Die woorde van Katie gryp mens aan as sy jou stip in die oë kyk en sê: “Almal ken my, maar niemand sien my siel nie. Ek’s mos invisible.”
Hennie van Greunen bring Florian Zeller se Franse drama Le Père (The Father) in Afrikaans na die KKNK. Die vertaling vir dié debuutdrama, Pa, is gedoen deur Elouise du Toit en Naomi Morgan. Chris van Niekerk vertolk die hoofrol van André, die 65-jarige pa wat deur sy dogter versorg word. Hennie van Greunen verduidelik: “Ons begin sien hoe die oom vergeet. Ons sien hy is in ’n wêreld wat hy nie meer verstaan nie.”
Milan Murray, Stian Bam, Roeline Daneel, Ira Blankenberg en Benedikt Sebastian sluit by Van Niekerk aan. Hierdie vertoning beloof om ’n hartroerende en onvergeetlike produksies te wees. Volgens Van Greunen gaan dié ses spelers gehore se harte roer.
Die klassieke Suid-Afrikaanse teaterstuk, Sizwe Banzi is Dead, is ’n verdere hoogtepunt by die fees. Oorspronklik geskryf in 1972 deur Athol Fugard, Winston Ntshona en John Kani, het die stuk groot opslae oorsee en in Suid-Afrika gemaak.
Die nuwe produksie het reeds ’n speelvak in ondermeer New York gehad en word nou spesiaal na Oudtshoorn gebring. Atandwa Kani en Mncedisi Shabangu is in die rolverdeling.
Atandwa Kani is onlangs genomineer vir ’n Fleur du Cap as beste akteur vir sy vertolking. John Kani beskryf die stuk as ’n doelgerigte skepping van ’n kreet teen ongeregtigheid en ’n bewusmaking onder die kunsgemeenskap, dat ook hulle hul deel moet doen in die veg vir gelykheid.
Alhoewel die teks ’n ernstige tema aanpak, is die aanslag komies. Gehore huil van die lag en lag van die huil.
Ander hoogtepunte uit die toneelprogram sluit die plekspesifieke drama Nagwandelaars (met Geon Nel, Carel Nel en Lanel van der Kolff), die riller Kul (met Tobie Cronjé, Nicola Hanekom en Wilhelm van der Walt), die bekroonde dramas Die Dag is bros (met o.a. Sandra Prinsloo en Nicole Holm), Hemelruim (met Tinarie van Wyk Loots en Paul du Toit), Son.Maan.Sterre (met o.a. Louis van Niekerk, Lida Botha en Gretha Pieterse) en die eenmanvertonings Blou-blou (met Erik Holm), Die Man Jesus (met André Lombard), Rooivalk (met Richard September) en Santa Gamka (met Marlo Minnaar) in.
Die volledige feesprogram is beskikbaar by www.kknk.co.za.
Kaartjies is te koop by Computicket, Shoprite / Checkers en House & Home. Verblyfbesprekings kan aanlyn gedoen word.
ARTIKEL: LIEZL VAN NIEKERK, OUDTSHOORN COURANT-JOERNALIS
'Ons bring jou die nuutste Oudtshoorn, Klein Karoo nuus'
