OUDTSHOORN NUUS - As jy in die bevoorregte posisie is om 'n betroubare motor van 30 jaar of ouer te besit kan jy een van slegs nege eienaars wees om in Oktober tydens die George Erfenisfees aan 'n unieke erfenistoer deel te neem.
Die bekende bewarings- en omgewingskundige, Katot Meyer, bied op Sondag 2 Oktober 'n toer op die spoor van die bekende botanis WJ Burchell aan. Tydens sy reis deur die Tuinroete was 'n plek net noord van George se botaniese tuine een van Burchell se oornagkampe op 3 Oktober 1844. Dit is dan ook hier waar die erfenistoer om 09:00 op 2 Oktober begin.
Volgens Meyer het Burchell se reise deur die Tuinroete slegs 3% van die afstand van sy totale trek beslaan waartydens hy navorsing oor plante gedoen het. Die 3% het egter gesorg vir meer as 40% van die inligting wat hy versamel het.
Nege voertuie wat voor 1986 gere-gistreer is gaan op 2 Oktober ongeveer 300 km vanaf George en terug op die spoor van Burchell aflê. Meer as 80% van die afstand sal op grondpaaie wees.
- 'n Motor van 30 jaar of ouer
- 'n Padkaart van die Tuinroete ('n Handgetekende een sal ook deur Katot voorsien word)
- 'n Piekniekmandjie en 'n kombers vir 'n enjinkappiekniek
- Genoeg brandstof vir 'n heen-en-weerrit van ongeveer 300 km
- Tyd om rustig te ry en te geniet.
Volgens Katot is daar 'n hele reeks motors waaraan hy kan dink wat ideaal vir die toer sal wees.
" Audi 100 of 80, die W123 Mercedes reeks, VW Passat, -Jetta of -Golfs om maar net 'n paar te noem. As jy dalk jou ou kar verkoop het en nou spyt is gaan leen hom of steel hom terug vir die dag en kom ry saam. En as jy nie wil leen of wil steel nie kom as 'n passasier saam met iemand."
Die toer vertrek op 2 Oktober om 09:00 vanaf die botaniese tuin in Cale-donstraat George en eindig weer tussen 17:00 en 18:00 daar.
Om plek te bespreek of vir meer inligting kontak Katot Meyer by 044 272 0014. (Hy dra nie 'n selfoon nie en vra dat 'n duidelike boodskap gelaat word indien hy in die veld doenig is en nie 'n oproep kan beantwoord nie.)
