OUDTSHOORN NUUS - Die munisipaliteit gaan beslis nie regskostes dra in 'n saak waarin die voormalige burgemeester Gordon April, en 'n voormalige raadslid Wiltin Kawa, teregstaan nie.
Dit is die boodskap wat die hof hierdie week van die administrateur, Kam Chetty, gekry het.
Die verhoor in die saak teen die Gordon April, Noël Pietersen, Wilton Kawa, en vier vroue van Dysselsdorp, Lenie Piedt, Hester Herman, Shariefa Avontuur en Caroline Wagenaar, is hierdie week in die Oudtshoorn-streekhof tot volgende jaar uitgestel.
Dit volg nadat die hof 'n skrywe van die administrateur, Kam Chetty, ontvang het dat die munisipaliteit nie die regskoste van April en Kawa sal betaal nie. Volgens Chetty is daar geen raadsbesluit in die verband nie.
Die saak is Dinsdagmiddag deur streeklanddros Herman Pieters van Kaapstad, tot Woensdagoggend uitgestel vir duidelikheid in die verband nadat die waarnemende finansiële hoof, Peter Esau, Chetty se boodskap aan die hof oorgedra het.
April en Kawa se regsverteenwoordiger adv. Jerome van der Schyff, het die hof later voorsien van 'n skrywe van die waarnemende munisipale bestuurder, Ronnie Lottering, en 'n munisipale regsman, Thomso Tofile, waarin ooreengekom is oor die betaling van April en Kawa se regskoste.
Esau het die hof egter meegedeel dat amptenare nie so 'n besluit kan neem nie en dat 'n raadsbesluit in die verband nêrens opgespoor kon word nie.
Die landdros was duidelik omgekrap omdat die saak vir drie dae op die hofrol geplaas is en dit die staat derduisende rande uit die sak jaag. Daar was reeds twee vorige geleenthede vir verhoor wat gekanselleer moes word. Hy het die saak tot Woensdag uitgestel en opdrag gegee dat Lottering en Tofile die hof van antwoorde verskaf.
Pieters het ook sy teleurstelling uitgespreek oor die vier vroue wat hul regsverteenwoordigers die oggend in die pad gesteek het omdat konsultasie glo nog nie plaasgevind het nie.
Die saak spruit uit 'n ondersoek deur die spesiale ondersoekeenheid (SOE) wat in 2011 by die Oudtshoorn-munisipaliteit gedoen is. Die SOE het daarna aanbeveel dat die sewe strafregtelik vervolg word.
Die vroue was stigterslede van 'n organisasie met die naam RUFED (Rural Family Empowerment & Development Co-operative) wat gestig is vir die finansiering vir programme vir behoeftige vroue, kinders en die jeug.
Volgens die lywige klagstaat het die Oudtshoorn-burgemeesterskomitee 'n besigheidsplan van die organisasie goedgekeur en 'n bedrag van R282 018 in RUFED se bankrekening inbetaal. Behoorlike boekhouding is glo nie gedoen nie.
Pieters het die saak tot 26 Januarie 2016 uitgestel wanneer hy wil seker maak dat alles uitgesorteer is vir die verhoor van 10 tot 12 Mei 2016.
"Ek sal dan geen verskonings aanvaar nie. Diegene wat nie regsverteenwoordiging het nie sal hul eie verdediging moet waarneem en diegene wat in die hospitaal is sal met 'n rolstoel die hof ingestoot moet word."
"Die saak moet nou afgehandel word," het streeklanddros Pieters gesê.
Klik hier vir vorige artikels:
- Sand-en-klip-diefstalsaak weer uitgestel
- Nuwe prokureur in sand-en-klip-saak
- Twis oor April se regskoste draai in hof
- Munisipaliteit betaal nie verdere regskostes
- Opvolg: Oud-burgemeester in hof
- Burgemeester se sand en klip verhoor begin
- Oudtshoorn burgemeester in hof
ARTIKEL: GARNETT WICOMB, OUDTSHOORN COURANT - KORRESPONDENT
'Ons bring jou die nuutste Oudtshoorn, Klein-Karoo nuus'
