OUDTSHOORN NUUS - Die kaptein van die plaaslike Union Stars-krieketklub, Eugene Piedt (25) het Sondagoggend gesterf nadat hy die vorige aand met 'n mes gesteek is.
Piedt se ma, Hendriena, vertel van die skok wat sy gekry het toe sy uitvind haar seun is dood.
Volgens haar het Piedt nog Saterdag by haar kom spog oor sy drie paaltjies wat hy vir sy klub geneem het.
Sy sê daar het later 'n vrou met twee mans by haar huis in Rosebank opgedaag.
Volgens kapt. Louis Visser, woordvoerder van die Oudtshoorn-polisie, word 'n klag van moord ondersoek.
Enrique Pietersen, voorsitter van Union Stars-krieketklub, het Piedt as 'n talentvolle speler beskryf en gesê die klubfamilie betreur die tra-giese dood van so 'n jong speler.
Pietersen sê Piedt het as skoolkind by die klub aangesluit, waar hy op skoolvlak SWD verteenwoordig het en later kaptein van die B-span geword het. Piedt het ook al Union Stars in die primierliga verteenwoordig.
Hy voeg by dat Piedt 'n ongelooflike invloed op die nuwe, jong spelers van die klub gehad het en hulle altyd probeer help en leer het waar hy kan.
"Die een ding wat altyd by my sal vassteek is dat hy twee weke gelede gesê het hy kan nie wag om eendag saam met sy seuntjie krieket te speel nie."
Piedt laat ook sy twee kinders, Eugene (2), en Chrisenda (3), agter.
Sy begrafnis is Saterdag 10:00 vanuit sy huis in Rosebank en 11:00 vanaf die Independente Kerk in Bridgton.
Klik hier vir 'n vorige nuusflits.
Ondersoekbeamptes praat met Geraldo Jullies op die toneel waar hy en Eugene Piedt aangeval is.
ARTIKEL EN FOTO: LIEZL VAN NIEKERK, OUDTSHOORN COURANT-JOERNALIS
'Ons bring jou die nuutste Oudtshoorn, Klein-Karoo nuus'
