Nuwe huise dié maand oorhandig

Die wooneenhede wat in Rosevalley gebou word. Foto's verskaf

OUDTSHOORN NUUS - Die nuwe huise wat deur middel van regeringsubsidies deur die Oudtshoorn-munisipaliteit in Rosevalley gebou word, sal die maand aan huiseienaars oorhandig word.
 
Die munisipaliteit het in 2016 die nuwe huise, waarvan 67 enkeleenhede, 46 skakelhuise en 222 dubbelverdiepingkomplekse is, begin bou.
 
Volgens Aurelia Oliphant, woordvoerder van die Oudtshoorn-munisipaliteit, het die munisipaliteit begin deur infrastruktuur soos stormwater- en rioolpype, sowel as lopende water na huise te installeer. Die projek is in drie fases verdeel waartydens daar 883 huise gebou sal word.
 
Die inwoners wat in opslaanhokke woon moet dus hul hokke afbreek en na 'n tydelike wooneenheid (bekend as die blinkhokke) skuif tot hul huise klaar gebou is.
 
"Die eerste eenhede is in 2015 oorhandig en hulle het ook toestemming gekry om meer huise te bou. Die tweede fase, waartydens die skakelhuise en dubbelverdiepingkomplekse gebou is, het in 2016 begin. Die derde fase behoort in Desember 2018 klaar te wees," lui die verklaring.
 
Die Rosevally-projek het sy ontstaan in 2010 gehad na mense wat in oorvol areas en in families en vriende se agterplase gewoon het grond wat aan die munisipaliteit behoort het beset het. Die naam het later na Rosevalley verander omdat dit van 'n informele- na 'n formele nedersetting verander het.
 
'Ons bring jou die nuutste Oudtshoorn, Klein Karoo nuus' 


Your Comments

Copyright 2017 Group Editors Co PTY Ltd t/a Oudtshoorn Courant