Plaaslike agent onder top 3 in SA

Jo-Marie de Kock (verkoopsagent) en Wynand Venter (handelaarshoof van Oudtshoorn Nissan en Renault) pas nadat Jo-Marie die tweede plek as topverkoopsagent in die land aangewys is. Foto: Hannes Visser

OUDTSHOORN NUUS - Minder as twee jaar nadat sy as verkoopsagent by Renault in Oudtshoorn aangestel is, is Jo-Marie de Kock aangewys as een van die drie beste kleinhandelaar verkopers in die land.
 
Sy het deur harde werk, uitstekende kliëntediens en toewyding die topdrie behaal en is twee weke gelede in Johannesburg as die naaswenner aangewys. Renault is 'n opkomende handelsmerk en dus 'n groot uitdaging vir hierdie knap verkoopsagent.
 
Oor haar prestasie het Jo-Marie vandeesweek gesê: "Ek is trots om deel van Renault te wees, ek glo so in my produk dat ons gesin onlangs ook 'n Renault aangeskaf het. Dankie aan my man en kinders wat my ondersteun, want almal in die De Kock-huis verkoop nou karre," spot sy.
 
"Dankie ook vir ons span by Oudtshoorn Nissan en Renault wat uit hulle pad gaan om my by te staan. Dit help nie 'n verkoopsagent werk hard, maar daar is nie goeie ondersteuning van die span nie, en hier kry ek al die ondersteuning moontlik. Sonder hulle samewerking sou ek dit nie gemaak het nie."
 
Wat haar kliënte betref is Jo-Marie ook baie dankbaar. "Ek kon net bereik wat ek bereik het met die ondersteuning van Oudtshoorn se mense."
 
Die handelaarshoof van Oudtshoorn Nissan en Renault, Wynand Venter, het gesê dat Jo-Marie se prestasie soveel groter is as in ag geneem word dat sy nasionaal met Renault verkoopsagente meeding en die marksegmant is beperk.
 
"Sy werk baie hard en ons is voorwaar trots op haar."
 
Jo-Marie was vir bykans tien jaar die verkoopskonsultant van Oudtshoorn Courant. Hiermee ook ons gelukwensing met haar puik prestasie. – Redakteur
 
ARTIKEL & FOTO: HANNES VISSER, OUDTSHOORN COURANT-REDAKTEUR
 
'Ons bring jou die nuutste Oudtshoorn, Klein Karoo nuus' 


Your Comments

Copyright 2017 Group Editors Co PTY Ltd t/a Oudtshoorn Courant