PRINS ALBERT NUUS - Dis alles 'n slinkse plan om hom polities te ontsenu en die DA op Prins Albert 'n knou toe te dien.
So sê die speaker van Prins Albert, Stoffel Botes (DA), oor die klag van aanranding met die doel om ernstig te beseer wat vroeër vandeesmaand teen hom ingedien is.
Botes, wat op Klaarstroom woon, het Maandag in die landdroshof op Prins Albert voor landdros Tom Gouws op dié aanklag verskyn.
Die klaagster, Elzaine Arries (31), ook van Klaarstroom, was ook in die hof en is na die beskuldigdebank geroep pas ná Botes se verskyning. Botes en sy vrou, Carina, en hul dogter, Belinda, het weer 'n klag van aanranding teen Arries gelê.
Nie een van die twee aangeklaagdes is gevra om te pleit nie. Botes se saak is uitgestel tot 1 Maart en Arries s'n tot 8 Maart. Albei het aangedui dat hulle hul eie regsverteenwoordiging gaan aanstel.
Oudtshoorn Courant het albei partye genader oor die klagtes. Botes hou vol dat die hele kwessie hom verbaas, en dat hy dit toeskryf aan po-gings van die ANC om die DA in die gebied te diskrediteer.
"Die DA het Prins Albert van die ANC weggevat. Hulle kan dit nie vat dat óns nou in 'n koalisie met die Karoo-Gemeenskapsparty is en hulle die dorp verloor het nie. Die man aan die voorpunt van hierdie pogings om my in 'n swak lig te stel, se party het nie net die ver-kiesing verloor nie – daai ou het nie eens 'n wyk gewen nie. Sy pogings om Maandag 'n optog teen my na die hof te reël, het ook nie gewerk nie. Ek was verstom om in die Son van die aanrandingsklag te lees."
Arries hou vol dat nie net Botes nie, maar ook sy vrou en dogter haar op Saterdagaand 4 Februarie in die straat voor die Botes-gesin se huis op Klaarstroom "gepak" het.
Arries, 'n werker van die department sport en kultuur by skole op Prins Albert, sê dit het alles begin toe sy 'n dronk familielid ná 'n kuiery huis toe wou vat. "Ek het vir haar gesê sy is dronk en het 'n mes wat sy by haar gehad het, afgevat en dit voor by my borste ingegooi."
Dis waar die moeilikheid begin het, vertel
Arries. "Iemand het my geklap, en ek het teruggeklap."
Die speaker het glo na bewering gesê: "Hoekom donner julle nie vir Elzaine nie," vertel Arries. Dis toe dat sy deur verskeie mense aangerand is, volgens haar.
"Ek het net die hele tyd vir my gesig gekeer. Ek wou nie hê daar moet merke in my gesig wees nie, want ek werk met kinders. Stoffel, wat met 'n niggie van my getroud is, het my met die vuis op die mond geslaan," het Arries gesê.
Sy het selfoonfoto's van haar geswelde mond aan Oudtshoorn Courant gewys wat glo net ná die beweerde voorval geneem is. "Hy het my só hard geslaan, dat ek my broek natgemaak het."
Arries het voorts vertel dat sy op die oor geklap is en dat haar rok van haar "afgeskeur" is. "My lyf was so seer van die houe dat ek eers ná twee dae polisiekantoor toe gegaan het om die klag te lê."
Dis vir haar moeilik om 'n bekende en gewilde politikus hof toe te sleep, het 'n huilende Arries gesê. "Maar ek gaan nie die saak daarlaat nie. Ek gaan veg tot die einde sodat geregtigheid geskied."
Volgens Botes is daar genoeg ooggetuies wat uiteindelik die ware storie aan die hof sal kan vertel. "Maar ek kan daarvan getuig dat, vandat die DA-koalisie verlede jaar hier aan bewind gekom het, daar mense was wat alles in hul vermoë gedoen het om die DA te ondermyn."
Die klaagster, Elzanne Arries (regs), is by die hof ondersteun deur haar suster, Leandre'. Elzanne Arries het net na' Botes ook op 'n aanrandingsklag verskyn. Hierdie klag is deur Botes en sy gesin gele^. Al die klagte spruit uit 'n voorval op 4 Februarie voor die Botes-gesin se woonhuis op Klaarstroom waar verskeie mense glo handgemeen geraak het.
ARTIKEL: MARLENE MALAN
'Ons bring jou die nuutste Prins Albert, Klein Karoo nuus'
