DE RUST NUUS - De Rust het reeds vir 'n week nie water wat geskik is vir menslike gebruik nie. Die water wat uit die krane kom is swart van die roet na die brande van die afgelope Desembermaand.
Die reën wat verlede week geval het, het ondermeer roet, modder en stokkies in die rivier en opgaardam laat beland wat die water besoedel het en ook veroorsaak het dat waterpype verstop raak. Die waternood in De Rust het hierdie week tot onbaatsugtige skenkings van water vanuit verskeie oorde gelei.
Auriela Oliphant, kommunikasiebeampte van die Oudtshoorn-munisipaliteit, het in 'n verklaring gesê: "As gevolg van die onlangse brand in die opvangsgebied van die Huisrivier (De Rust se waterbron) en die donderstorm in die gebied op 5 Januarie, ondervind De Rust tans watervoorsieningsprobleme.
Water is tans erg gekleurd en bevat groot hoeveelhede stokkies en ander plantmateriaal wat verstoppings in die toevoerlyne veroorsaak. Die normale toevoerlyne vanuit die Huisrivier is dus toegedraai totdat die watergehalte van so 'n aard verbeter het dat dit gebruik kan word.
"Tans word water uit 'n boer se dam aan De Rust gelewer omdat dit nie verstoppings in die verspreidingsnetwerk veroorsaak nie. Hierdie damwater is egter nie geskik vir drinkdoeleindes nie en moet slegs vir toilet- en wasdoeleindes aangewend word. Hierdie voorsieningsbron se leweringskapasiteit voorsien egter net in die helfte van De Rust se normale daaglikse behoeftes."
Sy het verder gesê De Rust beskik nie oor watersuiweringswerke nie maar wel oor 'n chlorine-ringstelsel.
"Die chlorineringstelsel is tans afgeskakel, want met die groot hoeveelhede vaste stowwe in suspensie in die damwater is die chlorinering van
hierdie water totaal oneffektief.
Die Huisrivier word daagliks gemonitor en sodra die kwaliteit van die water genoegsaam verbeter, sal dit in die verspreidingstelsel geplaas word. Dit kan egter nog etlike dae duur."
Die Oudtshoorn Courant het gisteroggend (Donderdag 12 Januarie) met De Rust se raadslid, Raymond Wilschut, gesels.
Volgens hom was watertoevoer na dele van die dorp reg, maar is daar ander dele van die dorp wat nog nie lopende water het nie.
Hy het verder gesê dat hy nie dink inwoners besef die omvang van die situasie nie.
"Dit is 'n groot probleem dat daar nie water is nie, maar dit is verblywend om te sien dat die mense bydraes maak. Die munisipaliteit werk waarlik hard aan die probleem en ek tesame met personeel van rampbestuur het Woensdagaand 21:00 begin om water te versprei en het eers vanoggend 08:00 by die huis gekom," het hy gesê.
Jan Venter, eienaar van House Martin Guest Lodge in De Rust, sê die waterkrisis beïnvloed veral die besighede op die dorp.
"Ons moes baie van ons besprekings kanselleer. Mense wat die dorp besoek lees op sosiale media en hoor oor die nuus van ons waterkrisis en verkies dan om eerder nie te bly nie. Die restuarante word voorsien van water sodat hulle kan kos maak en skottelgoed was, maar dit raak maar die besighede," het hy gesê.
Volgens hom is daar egter steeds 'n silwer randjie om die donker wolk.
"Met die krisis het my geloof in die mensdom weer beter geraak. Ons het selfs 'n inwoner van Cape St Francis in die Oos-Kaap gehad wat kom water aflewer het. Dit is vir my verblywend om te sien hoe 'n gemeenskap kan saam staan en saam werk in 'n krisis tyd," het hy gesê.
Die Oudtshoorn Courant is verlede Vrydag ingelig oor die waterkrisis. Hester Grint, 'n inwoner van Oudtshoorn het 'n waterskenkingsprojek begin en nadat dit op Facebook geplaas is het die nuus vinnig versprei. Skenkings het van heinde en verre ingestroom sodat die inwoners van De Rust genoeg drinkwater en genoeg water vir
huishoudelike gebruik het.
Fruit Lovers Market het 'n krat geskenk wat by Pick n Pay neergesit is sodat mense water kan skenk. Pick n Pay het Vrydag 50 vyf liter bottels water geskenk.
Rodney Gelant van Oudtshoorn, sê hy het toevallig op een van sy vriende se Facebook gelees van die krisis en toe begin om bottels water by sy vriende te kry.
"My vriende bring bottels en bottels tot by my huis en die wat nie vervoer het nie bel my en sê ek moet kom oplaai. Dit is ongelooflik om te sien hoe vinnig nuus versprei en hoe vinnig ander bereid is om te help as daar 'n krisis is," vertel hy.
Rodney het Woensdag bottels by Pick n Pay afgelewer en barmhartige samaritane wat in Willowmore woon het aangebied om op pad huis toe die water in De Rust af te laai. Shoprite in Oudts-hoorn het ook Dinsdag 15 120 liter gebottelde water gekenk.
Cango Valley Water het 120 liter water geskenk maar gaan in totaal 1200 liter skenk.
Esmari du Plessis van Oasis Water in Oudtshoorn, het Donderdagoggend 2000 liter water in De Rust afgelewer. Sy het een van haar vragmotors uit Graaff Reinet gestuur.
Colan Sylvester, burgemeester van die Oudtshoorn-munisipaliteit het ook uit sy eie sak 22 bottels water van vyf liter elk gekoop wat aan De Rust geskenk is.
Anthony en Jeanette Dadley van Pretoria pas tans 'n huis in De Rust op en help ook om water aan te ry vanaf Oudtshoorn.
"Die waterkrisis is nogal 'n probleem veral wanneer dit by wasgoed en stort kom," het Jeanette gesê.
Hester sê daar is "letterlik honderde duisende
liters water deur na De Rust".
"Ek kan nie glo die mense se harte het so vinnig oopgegaan nie. Vrydag nadat die nuus bekend gemaak is het ons om 12:00 'n hele bakkievrag water deurgestuur na De Rust en dit hou net aan. Woensdag het leerders van Struisies ook bottels water saam skool toe geneem," vertel sy.
Burgemeester Sylvester het elke persoon wat bygedra het bedank.
"Baie dankie vir almal wat water geskenk het. Ons vra egter dat mense steeds moet help waar hulle kan," het hy gesê.
Waterskenkings kan by Pick 'n Pay, die Oudts-hoorn en De Rust toerisme kantoor sowel as die Oudtshoorn Courant se kantore afgelewer word.
Die CP Nel Museum het ook gesê inwoners kan leë bottels na die museum neem waar dit gevul sal word en met 'n bakkie De Rust toe geneem sal word.
* 'n Inligtingsvergadering om die waterprobleem in De Rust te bespreek is gistermiddag na die koerant se spertyd in De Rust gehou.
Personeel van die Oudtshoorn-munisipaliteit sorg dat water dag en nag in die De Rust versprei word.
Klik hier vir vorige artikels:
- Vergadering in De Rust oor water
- Museum help De Rust met water
- Shoprite skenk water vir De Rust
- Skenk water vir De Rust
- Opvolg: Water vir De Rust
- Opvolg: Waterkrisis in De Rust
- Waterprobleme op De Rust
ARTIKEL: LIEZL VAN NIEKERK, OUDTSHOORN COURANT-JOERNALIS
'Ons bring jou die nuutste De Rust, Klein Karoo nuus'
