OUDTSHOORN NUUS - Die saak teen twee senior weermagoffisiere wat na bewering soldate in pantservoertuie na die Oudtshoorn-polisiestasie laat opruk en gedreig het om die stasie op te blaas is verlede week in die Oudtshoorn-streekhof voorlopig tot Februarie 2016 uitgestel.
Volgens die staatsaanklaer, adv. Michelle Weyers, het die regspan van die twee beskuldigdes, brig.gnl. Xolani Mankayi, voormalige bevelvoerder van die Infanterieskool op Oudtshoorn en die huidige bevelvoerder, kol. Nkhabu Nthejane, skrywes aan die kantoor van die direkteur van openbare vervolging (DOV) gerig en word daar op 'n antwoord van sy kantoor gewag.
Nie Mankayi, Nthejane of hul regsverteenwoordigers het die verrigtinge bygewoon nie. Hulle het reeds by hul vorige verskyning aansoek om afwesigheid ingedien.
'n Plaaslike prokureur, Rolene van Rooyen, het namens hul regspan opgetree.
Mankayi en Nthejane word daarvan aangekla dat hulle op 17 Mei verlede jaar sowat 100 soldate gemobiliseer, bewapen en in pantservoertuie na die polisiestasie op Oudtshoorn laat kom het om 'n aantal van hul makkers te "ontset" wat vroeër die dag tydens 'n polisie-klopjag by 'n kuierplek in Bongolethu in hegtenis geneem is.
Hulle het glo in die polisiestasie ook rassistiese aanmerkings teenoor die polisie aan diens toegesnou. Die polisie het die hekke na die perseel gesluit voordat hulle die soldate vrygelaat het.
Die saak dien voor streeklanddros Mark van Wyngaardt en adv. Joey Moses tree in opdrag van Lloyd Fortuin van Faure & Faure in die Paarl op vir die twee beskuldigdes.
Klik hier vir vorige artikels:
- Offisiere se saak tot 2016 uitgestel
- Weermaghoës se saak weer uitgestel
- 16 Instructors in military court
- Military officers failed to appear in court
- Saak teen weermag-offisiere uitgestel
- Twee in hof vir intimidasie
ARTIKEL: GARNETT WICOMB
'Ons bring jou die nuutste Oudtshoorn, Klein Karoo nuus'
