OUDTSHOORN NUUS - Die administrateur van Oudtshoorn, Kam Chetty het gister tydens 'n vergadering met rolspelers 'n terugblik op die probleme en suksesse van die administrasieproses sover gegee.
Volgens hom is die twee groot uitdagings die gebrek aan finansies met 'n skuldlas van meers R150 miljoen en politici en raadslede wat skynbaar nie belangstel om die administrasieproses te help nie, maar eerder verkies om kritiek te lewer en sy span se pogings te diskrediteer.
Chetty het in 'n sessie van bykans twee ure gesê dat hy alles in sy vermoë doen om Oudtshoorn op die regte pad te ruk, maar da thy nie 'n towernaar is nie. Volgens hom sal Oudtshoorn se herstel ten minste nog drie jaar duur, maar dit sal verg dat raadslede besef dat hulle kiesers eerste moet kom en politiek tweede. "Op die oomblik is dit politiek en individue eerste en mense laaste en dit moet dringend verander," het hy gesê.
Volgens hom is daar etlike prioriteite wat dringend aandag geniet en politici moet ophou om die span se pogings ten opsigte van hierdie prosesse in die wiele te ry.
Hy het hoofsaaklik die volgende prioriteite uitgelig:
Eerstens is daar streng finansiële maatreëls in plek om uitgawes te sny en ooreenkomste is met Escom en ASLA aangegaan vir die vereffening van hulle skuld.
Tweedens is daar forensiese ondersoeke aan die gang om aantygings te ondersoek en die ondersoekspan hou reeds hierdie maand onderhoude met mense oor beweerde betrokkenheid.
Derdens word daar ernstig gewerk om ten spyte van finansiële beperkings die kapasitiet van die rioolaanleg te verhoog. Daar word daagliks 8 megaliter riool ontvang, maar die aanleg het die kapsiteit om slegs 6,5 megaliter te verwerk.
Vierdens sê Chetty hy soek op alle moontlike departemente in die provinsie en nasionale regering geld om die swak paaie te herstel.
Vyfdens is die bestuur en onderhoud van die Kangogrotte ook 'n prioriteit.
Hy het gesê dat 'n hele maand verlore gegaan het waar kundiges ingeroep was om raadslede te motiveer om persoonlike kwessies opsy te skuif en hul pligte
Teenoor kiesers na te kom. Die proses moes egter gestaak word omdat dit geen verandering by raadslede teweeg gebring het nie.
As dit van hom afhang, sê Chetty, sal hy die administrasietydperk verleng tot met die plaaslike verkiesings volgende jaar. "Ek is nie bereid om vir ses maande met 'n span kundiges hard te werk net om na Januarie terug te staan en te sien dat alles wat bereik is weer tot niet gaan nie."
ARTIKEL: HANNES VISSER, OUDTSHOORN COURANT-REDAKTEUR
'Ons bring jou die nuutste Oudtshoorn, Klein-Karoo nuus'
