OUDTSHOORN NUUS - Die invalsentrum vir straatkinders het ‘n groot terugslag ervaar toe ‘n waterpyp oor die naweek gebars het en die Centre of Hope-gebou oorstroom het.
Franzu Badenhorst, direkteur van FAMSA Karoo, wat die invalsentrum fasiliteer, sit met sy hande in sy hare. “Ons sukkel reeds van Maandag af om die munisipaliteit hier te kry om ons te help opruim, maar teen vanoggend het ons die kinders gevra om maar self in te spring en skoon te maak.”
Badenhorst sê dat die sentrum noodgedwonge Maandag en gister moes sluit, maar dat die kinders wat deur die dag daar gehuisves word en etes kry dan letterlik op straat sit.
“Ons personeel probeer m,aar vanoggend tussendeur kosmaak vir die kinders. Dis nat en koud buite en nou is die plek wat hulle skuiling en voiding moet gee ook onder water.”
Bykans R100 000 is alreeds deur FAMSA spandeer om die gebou leefbaar te kry. Penny Pinchers het goedgunstiglik van die materiaal beskikbaar gestel totdat fondse bekikbaar is om te betaal en van die kontrakteurs het ook reeds werk gedoen teen hulle eie rekening.
'Ons bring jou die nuutste Oudtshoorn, Klein-Karoo nuus'
