OUDTSHOORN NUUS - Die raadsvergadering waartydens Oudtshoorn se begroting vanoggend aan die raad voorgelê sou word, en mosies van wantroue teen die burgemeester en onderburgemeester sou dien, is tot Maandag om 10:00 uitgestel.
Die DA het voorgestel dat die vergadering uitgestel word aangesien die begroting deur die Wes-Kaapse minister van plaaslike regering, Anton Bredell, as 'n amptelike begroting gesertifiseer moet word.
Die onderburgemeester, Vlancio Donson en burgemeester, Gordon April, het egter ‘n teenvoorstel ingedien dat die vergadering moet voortgaan en die begroting en ander agendapunte moet dien.
Daar is met ‘n meerderheidstem van 13 teen 11 besluit dat die vergadering uitgestel sal word.
Die burgemeester het buite die raadsaal sy misnoeë te kenne gegee en gesê dat die begroting nie eers voor die minister hoef te dien nie.
Die koukusleier van die DA, Wessie van der Westhuizen het egter gesê dat die minister insae in die begroting moet hê aangesien die begroting nie soos deur die wet vereis teen 30 Junie goedgekeur was nie.
Hy het ook aangedui dat die DA se federale uitvoerende raad in samesprekings is en dat die koukus hulle daardeur laat lei.
Die onderburgemeester (links) en burgemeester het ‘n voorstel ingedien dat die raadsvergadering vandag afgehandel moet word.
ARTIKEL EN FOTO'S: HANNES VISSER, OUDTSHOORN COURANT-REDAKTEUR
'Ons bring jou die nuutste Oudtshoorn, Klein-Karoo nuus'
