BEAUFORT-WES NUUS - Die leeu wat op 5 Junie uit die Karoo Nasionale Park ontsnap het, is veilig terug in ‘n boma in die park.
“Die leeu het Vrydag op sy eie begin terugloop in die rigting van die park,” sê Déan Gous, voorsitter van Agri Sentraal Karoo.
Volgens Gous is die leeu op die plaas Wilgebosfontein en daarna op Koedoeskloof Wildplaas opgemerk.
Maandagmiddag het hy teruggestap na Eltrus Mocke se plaas Palmietfontein waar hy tydens sy uittog ‘n klompie skape gevang het.
“Die leeu is op die plaas opgemerk waar hy in ‘n sonkolletjie gelê het,” vertel Gous. ’n Veearts is met Sanparke se helikopter tot naby die leeu geneem. Die leeu is omstreeks vyfuur met ‘n verdowingspyl geskiet en die laaste 20km terug park toe in ‘n wildnet vervoer.
“’n Leeu is deel van die katfamilie, en die kat kom weer,” sê Gous.
Die leeu het tydens sy omswerwinge sowat 24 skape doodgebyt en ‘n koedoe gevang. “’n Leeu sal enige ding wat by hom verbyhardloop probeer vang,” verduidelik Gous. “Dié een het duidelik ook die kuns aangeleer om deur drade te kruip.”
Die jong leeumannetjie van drie jaar is een van vier leeus in die park. Twee mannetjies is in 2010 ingebring, terwyl die rondloper en sy boetie in die park gebore is.
“Die park is 98 000 ha groot en daar is beslis genoeg plek vir vier leeumannetjies,” sê Gous. “Die leeus was waarskynlik naby Brandewynsgat toe die ander leeumannetjies hom geskraap het en hy onderdeur die draad ontsnap het.”
Die leeu is intussen van ‘n kraag voorsien sodat hy vorentoe makliker opgespoor kan word. Hy word tans in ‘n boma aangehou.
Vorige artikels:
Lees meer in Vrydag se Oudtshoorn Courant, asook aanlyn.
'Ons bring jou die nuutste Beaufort-Wes, Klein-Karoo nuus'
