Die burgerregteorganisasie Afriforum het pas 'n aanlyn petisie van stapel gestuur om landwyd steun te werf teen die planne van die Australiese maatskappy Peninsula Energy om mynbouaktiwiteite hier te begin.
Volgens Thomas van Dalen, woordvoerder vir mynbou van AfriForum, het Peninsula, “wat deur Rusland gefinansier" word, sowat 750 000 ha grond in die omgewing van Beaufort-Wes bekom om uraan te myn. Hulle beplan ook om 'n reuseverwerkingsaanleg buite die dorp op te rig.
"Die omgewingsimpakstudie is bykans voltooi en die volgende stap is om vir 'n mynlisensie by die departement minerale hulpbronne aansoek te doen. Daarom wil AfriForum 'n petisie aan die minister van minerale hulpbronne oorhandig om dié departement daarvan te oortuig dat die projek tot die totale vernietiging van 'n groot deel van die Karoo-ekostelsel sal lei”.
Die maatskappy Ferret Mining and Environmental Services het in Februarie vanjaar op versoek van Peninsula en sy Suid-Afrikaanse verteenwoordiger Tasman RSA Mines vergaderings vir openbare deelname in Beaufort-Wes, Laingsburg en Prins Albert gehou.
Die sluitingsdatum vir besware was middel-Maart. Al die vergaderings is goed bygewoon, en inwoners van die dorpe, plus die landbougemeenskap het sterk beswaar gemaak teen veral die radioaktiewe invloed op die omgewing, die gebruik van honderde miljoene liter water jaarliks in 'n omgewing wat bekend is vir sy waterskaarste, die vernietiging van ondergrondse waterbronne, plantegroei-vernietiging en die verandering van die aard van die dorpe.
ARTIKEL: MARLENE MALAN, KORRESPONDENT
'Ons bring jou die nuutste Klein-Karoo nuus'
