Winterkrismis in Calitzdorp

Besoekers tydens verlede jaar se fees by die stasie. Foto: Tisha Steyn

CALITZDORP NUUS - Karoo Krismis is die tema van vanjaar se Calitzdorp Winterfees, wat van 16 tot 18 Junie plaasvind.
 
Soos gewoonlik is die hoof kuierplek die Calitzdorp-stasie, maar aangesien die hele gemeenskap by die fees betrokke is, word die tema ook elders in die dorp uitgedra.
 
Calitzdorp en kos is pasmaats, en daar is talle kulinêre hoogtepunte om na uit te sien soos die drie verskillende langtafelhuiers wat Vrydagaand plaasvind: Die Winterfees se langtafel Krismisdinner, Emile Minnie se kabaret in die stasiegebou en Boplaas Kelders bied 'n Middeleeuse langtafel-dinee aan.
 
Saterdag word die koskapperjolle verder gevoer met 'n Biscotti-proe by De Krans Kelder, 'n uithalerete by Calitzdorp Kelders en 'n Wynpas by The Queen of Calitzdorp. Sondag word vir oulaas brekfis geëet by Calitzdorp Kelders.
Die Donkiekar-boereorkes speel Saterdag by die stasie. Nog boeremusiek volg Saterdag-aand by die Skuurdans by Klokkie op 'n plaas net buite die dorp.
 
Die fees begin met 'n trompoppie-optog wat deur die dorp beweeg en by die stasie eindig. Teen die tyd dat hulle by die stasie aankom, gaan die stalletjies klaar regstaan met eet- en drinkgoed. Die stalletjies gaan tot laatnag as nagmark besigheid doen.
 
Saterdag 09:00 begin 'n marathon veerpyltjie-kompetisie wat eers Sondag eindig. En soos wat die spanne die pyltjies gooi, sweet die kleingoed om hul windmaker draadkarre te laat wen. Rieldansers uit die kontrei tree Saterdagmiddag op.
 
Die NG Kerk Calitzdorp hou vanjaar hul basaar tydens die Winterfees waar tradisionele basaargoed ter stywing van die kerk se fonds verkoop word. Drie-uur Saterdagmiddag tree die Suid-Kaap Kinderkoor van George in die kerk op.
Sondagoggend vind die Calitzdorp MTB Classic 2017 plaas. Die 60 km roete deur die asemrowende natuurskoon van Groenfontein en die Rooiheuwels begin en eindig by die stasie.
 
Toegang tot die feesterrein by die stasie is vanjaar gratis. "Om fondse te in vir die noodsaaklike ondersteuning van verdienstelike liefdadigheids-organisasies in die dorp, is daar kaartjies vir 'n gelukstrekking by verskeie punte beskikbaar," sê Zelma Kriek, hooforganiseerder van die Winterfees.
 
Die volledige program en kontaknommers vir besprekings is beskikbaar op die Winterfees-webblad asook die webblad van Calitzdorp-toerisme, of kontak Zelma Kriek by 082 576 5855 vir meer inligting.
 
 
ARTIKEL & FOTO: TISHA STEYN
 
'Ons bring jou die nuutste Calitzdorp, Klein Karoo nuus'


Your Comments

Copyright 2017 Group Editors Co PTY Ltd t/a Oudtshoorn Courant